قصة جوزي اتجوز زوجة اخوه انا هند من خمس سنين اتجوزت عزت و سكنا في شقة في نفس البيت مع حماتي و سلفي . حماتي هي اللي ربت زوجي و سلفي بعد وفاة والدهم و هما صغيرين لما حمايا توفى كانت حماتي لسه في عز شبابها بس هي رفضت الجواز و وهبت حياتها لأول…
انا هند من خمس سنين اتجوزت عزت و سكنا في شقة في نفس البيت مع حماتي و سلفي .
حماتي هي اللي ربت زوجي و سلفي بعد وفاة والدهم و هما صغيرين لما حمايا توفى كانت حماتي لسه في عز شبابها بس هي رفضت الجواز و وهبت حياتها لأولادها ربتهم و كبرتهم علشان كده جوزي و سلفتي مش بيستحملوا الهوا علي حماتي و روحهم فيها .
سلفي متجوز قبلنا بسنتين و عنده ولدين .بعد جوازنا ربنا رزقنا بأحمد و بعد أحمد زينب .و بالرغم من إني كنت ساكنة مع أهل جوزي في نفس البيت إلا ان علاقتي بيهم كانت كويسة لأننا ما كناش بنختلط ببعض كتير حتي حماتي في ست بتيجي تعمل لها شغل البيت و لو احتاجت حاجة ما كانتش بتطلب مني أنا أو من سلفتي بصراحة كانت بتطلب من أولادها يعني كل واحد في حاله .
بعد 3 سنين من جوازنا نقلنا في شقة تانية أقرب من شغل جوزي .بعد ما نقلنا جوزي كان على طول يتصل بوالدته يتطمن عليها و كان بياخدني أنا و الأولاد و نروح لها مرة كل أسبوع في يوم إجازته لو في يوم كنت تعبانة أو مش فاضية إني أروح معاه كنت بقوله يروح هو بس ماكنش بيرضى و يقولي : يعني حتى يوم الإجازة هقضيه بعيد عنكم .
كنت أقوله : إحنا راضيين روح أنت اتطمن علي مامتك و إرجع .كان يرد و يقولي : خلاص هتصل أطمن عليها و نبقي نروح كلنا في يوم تاني رجلي على رجلكم .
كانت حياتنا مثالية و جميلة لحد ما فجأة من سنة توفي سلفي في حادثة وهو في عز شبابه و ساب مراته و طفلين عندهم 6 سنين و 4 سنين .و كانت وفاتة صدمة كبيرة لجوزي و حماتي .و بعد فترة من وفاة سلفي بدأت ألاحظ حاجات غريبة علي جوزي
بعد وفاة سلفي ب 6 شهور بدأت ألاحظ حاجات غريبة علي جوزي ما كانتش بتحصل قبل كده واحدة واحدة بدأت زياراته تزيد أوي لحماتي قلت عادي عاوز يعوضها عن غياب أخوه بس اللي مش عادي أنه بعد ما كان مابيروحش من غيرنا لأ ده بقي يتحجج أي حجة علشان مانروحش معاه مثلا بقي يطلع من الشغل علي هناك علي طول و يتصل بيا يقولى اتغدوا انتو علشان أنا هتغدى عند والدتي
يوم إجازته وهو رايح ما بقاش يرضي ياخدنى معاه و يتحجج إن العيال بيتعبوا من الطريق(اشمعني دلوقتي الطريق هيتعب العيال ما العيال كانوا أصغر من كده و كنا بنروح عادي )لأ و كذا مرة يتصل بيا من هناك يقولي الوقت إتأخر هبات .
و مرة في يوم أجازته جهزت لبسي ولبس الولاد و سيبته في أوضة الأطفال و بعد ما فطرنا دخل يلبس علشان يروح دخلت أنا كمان لبست ولبست العيال لما لبس و خرج و شافنا إحنا كمان لابسين بان عليه التوتر و سألني : إيه أنتو لبستوا ليه ؟قلتله : خارجين .
قالي علي فين ؟قلتله : معاك ماما (حماتي) وحشتني بقالي كتير ما شوفتهاش قلت بالمرة و أنت رايح تاخدني معاك أشوفها حتى كمان تشوف الولاد .بان علي وشه الضيق و قالي : ما تخليها المرة اللي جاية ده حتي أنا رايح وراجع علي طول .
قلتله : احنا لبسنا و خلاص لسه هنقلع يلا يلا هسبقك علي تحت .و سبناه و نزلنا نزل ورانا علي طول .و إحنا في الطريق قالي : أنا هرد علي والدتي علشان اعرفها انكم جايين معايا .قلتله : لأ خليها مفاجأه دي هتفرح أوي لما تلاقي العيال داخلين عليها .
لما وصلنا دخلت سلمت علي حماتى و الولاد سلموا عليها و علي ولاد عمهم و لاقيت سلفتي خارجة من مطبخ حماتي و هي علي سنجة عشرة لابسه ومتمكيجة اللي يشوفها مايقول إن دي جوزها متوفى من 8 شهور و أول ما شافتني بان علي وجهها أنها تضايقت سلمنا على بعض .
نظرات سلفتي لجوزي كانت مفضوحة أوي طول القعدة و كل كلامها كان موجه لجوزي بمنتهى الدلع و جوزي كان يحاول يتجنبها عشان ماخدش بالي .
بعد ما روحنا قلت لجوزى أنا عاوزة أرجع شقتنا تاني علشان نبقي جنب مامته علي طول أول ما قلت كده لجوزي اتخض و قالي لأ و شغلي قلتله ما إحنا كنا فيها و كنت بتروح شغلك عادي وبعدين لو رجعنا الشقة هتوفر مشاوير مرواحك لمامتك و هنبقي جنبها كلنا بس هو رفض ورفض هده أكد لي إن في حاجة مش طبيعية .
بعد عشر أيام جوزى اتصل بيا قالي أنو رايح لحماتي بس أنا سمعت صوت ابن سلفي في التيليفون سألته قولتله أنت روحت و لا لسه هتروح قالي لأ لسه هروح و ممكن أبات قلتله وما له من غير تفكير لبست و لبست أولادي و روحنا لحماتي .أول ما حماتي شافتني تلجلجت دخلت سلمت عليها وقلتلها : أومال فين عزت قالي إنو جايلك .قالتلي فوق عند سلفتك
بعد ما حماتي قالتلي ان جوزي فوق عند سلفتي قلتلها : طيب هطلع أنادي له و بالمرة أسلم علي دلال ( سلفتي ) .
قالتلي : تلاقيه هينزل دلوقتي دي سلفتك نادت له مش عارفة عاوزاه يعملها إيه في الشقة خليكي و هطلع أنادي له أنا .قولتلها : لأ خلي الولاد معاكي و مع ولاد عمهم و أنا هطلع انا و سبتها و طلعت قبل ما تتكلم تاني .
خبط علي الباب …. لما الباب فتح لاقيته خارج لي بفانلة حمالات و بنطلون ترنجو لمحتها وراه لابسة عباية خفيفة و شعرها مش متغطي .أول ما شفت المنظر من سكات خدت بعضي و نزلت علي حماتي علشان أخد ولاديو هو نزل جري ورايا ماتفهمنيش غلط و الله ما فيش حاجةحماتي أول ما شافته قالتله : مش دلال نادت لك علشان تصلح حاجة في شقتها .
قالي : اه كنت بشوف السخان مش راضي يشتغل ليه .قلتله بتشوف السخان بالفانلة الحمالات .و خدت ولادي و نزلت و هو نزل جري ورايا يقولي هفهمك كل حاجة .سبته بيتكلم و وقفت تاكسي و روحت علي بيت والدي و أنا منهارة و حكيت لهم كل حاجة .
و عدي أسبوع و بالرغم من ان أول مرة جه فيها والدي هزأه بس فضل ييجي طول الأسبوع كل يوم يطلب يقابلني و أنا مكنتش برضي أقابله كنت بخرج له الولاد يسلموا عليه و كان بيقعد شوية ويمشي .و بعد الأسبوع وافقت أني أخرج أقابله .
أول ما شفته قلتله : أنا عاوزه أعرف ايه اللي بينك و بين مرات أخوك ازاي والدتك تسمح بحاجة زي دي وكمان بتداري عليكم ؟ واعمل حسابك لو كدبت فيأي حاجة اعتبر ده نهاية كل اللي بيني وبينك .قالي : و الله دي مراتي علي سنة الله ورسوله .أول ما سمعته بيقول كده قولتله : مراتك امتي وازاي ؟؟؟؟؟و ليه أنا قصرت معاك في إيه ؟؟؟؟؟؟؟؟؟؟؟ قولي !!!!!! طبعا كنت منهارة إزاي يعمل فيا كده .
قالي أنا ما كنتش موافق بس لولا إن والدتي ضغطت عليا لأنها كانت عيانة جامد في الفترة ديو أنا خفت تروح مني زي أخويا بالذات ان دلال قالت لها أنها مش هتقعد و هتتجوز فما كانش قدامي غير أني أوافق أمي كان كل همها ان ولاد أخويا محدش غريب يربيهم .قلتله : أنتو صح مش معقول حد غريب يربي ولاد أخوك أنت أولى بيهم بس ولادك بقي أنا هجيبلهم راجل غريب يربيهم علشان أبوهم بيربي و لاد عمه مطلقتي ……
قالي : أنا عمري ما أقدر أستغني عنك و لا عن ولادي و لولا أن أمي ضغطت عليا عمري ما كنت وافقت أبدا بلاش تهدمي حياتنا أنا تعبت أوي من غيركم اليومين اللي فاتو دول ومستعد أعمل أي حاجةعلشان تسامحيني .قلتله : لولا أن عندنا ولاد كنت أصريت علي الطلاق بس علشان خاطر ولادي هديك فرصة تانية هقولك يا تختار ولادك يا تختارها هي و ده اخر كلام عندي .من غير ما يفكر قالي : موافق .
و بعد أسبوع جوزي جابلي ورقة طلاق سلفتي بالثلاثة و روحنا معاه البيت أنا والولاد .بالرغم من ان حماتي مكنتش موافقة وقاطعت جوزي فترة بس بعد ما الأمور هديت جوزي صالحها . أما سلفتي فأول ما عرفت أن جوزي طلقها سابت البيت لحماتي و أخدت ولادها معاها و راحت عند أهلها و طبعا هددت حماتي انها هتتجوز و مش هتخليها تشوف الولاد
بس بعد فترة اضطرت ترجع تكلم حماتي و رجعت البيت عشان مصاريف الولاد لأن جوزي هو اللي متكفل بيهم .أما جوزي و بصراحة كان بيحاول علي قد ما يقدر يراضيني و يعوضني عن اللي عمله و واحدة واحدة رجعنا زي الأول و ما بقاش يروح لحماتي لوحده ابداااا
